Colaadda Ukraine: Putin ma ridi doonaa hubka Nukliyeerka?


Spread the love

Madaxweyne Vladimir Putin

Xigashada Sawirka, Anadolu Agency via Getty Images

Qoraalka sawirka,

Madaxweyne Vladimir Putin

Madaxweynaha Ruushka Vladimir Putin ayaa ku amray taliska militeriga Ruushka in ay “heegan khaas ah” geliyaan hubka Nukliyeerka iyo qalabka la xiriira – waana heegankii ugu sarreeyay ee la geliyo istiraatiijiyadda gantaallada ee Ruushka.

Isagoo la hadlayay madaxda sare ee militeriga, oo uu ku jiro Wasiirka Gaashaandhigga, Sergei Shoigu,, ayuu Putin sheegay in dalalka Reer Galbeedku ay sameeyeen “ficillo aan saaxiibtinnimo lahayn” oo ka dhan ah Ruushka ayna kusoo rogeen “cunaqabateyno sharci darro ah”.

Madaxweyne Putin oo Khamistii lasoo dhaafay ciidamadiisa ku amray inay howlgal ka fuliyaan Ukraine ayaa digniin u diray cid kasta oo soo faragelisa tallaabadaas.

“Faragelin kasta oo shisheeye waxaan u sheegeynaa haddii aad sameysaan, waxaad wajahi doontaan cawaaqib xumadii ugu weyneyd taariikhda” ayuu yiri Putin.

“Hadallada Putin waxay u muuqdaan halis toos ah oo ku saabsan Nukliyeerka” waxaa sidaas rumeysan Dmitry Muratov oo ku guuleystay abaal marinta nabadda isla markaana ah tafatiraha wargeyska Novaya Gazeta.

“Khudbadda uu ka jeediyay Putin teleefishinka, uma muuqan ninka kaliya ah ee hoggaamiyo Ruushka balse wuxuu u muuqday maamulaha adduunka, Putin wuxuu ku ag wareeganayaa hubka Nukliyeerka, wuxuu marar badan sheegay, haddii uusan jirin laheyn Ruushka, maxaan ugu baahanay dunida? cida hadalkaas u dhugatana ma jirto, balse waa digniin halis ah”

“Haddii Ruushka aan si wanaagsan loola macaamilin, waa sida uu isaga rabo, marka wax kastana waa in la burburiyaa” ayuu yiri Dmitry Muratov.

Xigashada Sawirka, AFP via getty images

Qoraalka sawirka,

Putin oo sanadkii 2005 si toos ah u daawanayay gantaal la tijaabiyay

Sanadkii 2018 -kii barnaamij laga diyaariyay Putin, wuxuu sheegay…”haddii oo qof doono in uu waxyeelleeyo Ruushka, wuxuu sharciga ina farayaa in aan jawaabno, waxay noqon doontaa masiibo banii’aadanimo oo ka dhacda dunida, waxaan ahay muwaadin Ruush ah iyo hoggaamiye, maxay tahay sababta aan ugu baahanay duni uusan kamid aheyn Ruushka?”

Sanadkan 2022-ka, Putin wuxuu duulaan dhulka, cirka iyo badda ku qaaday Ukraine balse ciidamadiisa waxay iska caabin xooggan kala kulmayaan ciidamada Ukraine.

Waddamada reer galbeedka waxay tallaabada Ruushka ee ka yaabisay uga jawaabeen cunaqabateyn baahsan oo looga golleeyahay in lagu curyaamiyo dhaqaalaha Ruushka.

Dimitry wuxuu hadalkiisa intaa raaciyay “Hadda waxay diiradda saaran tahay Putin, Putin ma heysto fursado badan, mar haddii cunaqabateyn iyo xayiraado lagu soo rogay Ruushka gaar ahaan nidaamka maaliyadda iyo bangiyada, waxay horseedeysaa in maamulka uusan shaqeyn” ayuu yiri Pavel Felgenhaur oo ka faalooda arrimaha gaashaandhigga fadhiigiisuna yahay Moscow.

“Fursadaha horyaalla Putin waxaa kamid ah in uu jaro adeegyadii shidaalka ee uu siin jiray Yurub isaga oo ku rajo weyn in dalalka Yurub ay ka laabtaan cunaqabateynta, tan kale waxaa weeye in nukliyeerka uu ku rido meelaha qaar sida badda waqooyi gaar ahaan inat u dhexeyso Britain iyo Denmark, markaa aan aragno waxa dhici doono”

Haddii Vladmir Putin uu doorbido in uu rido hubka Nukliyeerka, lataliyaashiisa ma isku dayi doonaan inay ka dhaadhiciyaan in uusan ridin Nukliyeerka?

“Dadkaas waxay la safan yihiin hoggaamiyahooda” ayuu yiri Dmitry Muratov.

“Ma jiro qof diyaar u ah inuu hor istaago Putin,” ayuu yiri Pavel Felgenhauer. “Waxaan joognaa meel halis ah.”


Like it? Share with your friends!

0

Comments

comments