Diyaaradda dagaalka ee uu Erdogan aad u rabo oo ay guuldarro cusub kasoo wajahday


Spread the love
F-16

Xigashada Sawirka, Reuters

Golaha Wakiillada ee Mareykanka ayaa Khamiistii meel mariyay hindise sharciyeed sii adkaynaya qorshaha uu Madaxweyne Joe Biden ku doonayo in uu diyaaradaha dagaalka ee noocoodu yahay F-16 uga iibiyo Turkiga.

Xildhibaannada Congress-ka ayaa isbaddal ku sameeyay Xeerka Difaaca Qaranka, si aysan diyaaraddaas si fudud gacanta ugu galin Erdogan.

Frank Pallone iyo Chris Pappas oo ka tirsan xisbiga Dimuqraaddiga ayaa mooshinkan horgeeyay aqalka, waxaana lagu ansixiyay aqlabiyad dhan 244 cod, halka 179 cod looga soo horjeestay.

Shuruudo cusub ayaa lagu xiray Madaxweynaha Mareykanka haddii uu tallaabo u qaadayo in uu diyaaraddaas ka iibiyo Turkiga.

Waxaa shuruudaha ka mid ah in Mareykanka uusan diyaaradaha F-16 siin karin Mareykanka ilaa dowladda ay ka caddeyso in tallaabadaas ay muhiim u tahay amniga qaranka Mareykanka.

Sidoo kale waxaa maamulka khasab ku ah in ay caddeeyaan tallaabooyinka ay u qaadeen xaqiijinta in diyaaradahaas marka Turkiga la siiyo uusan ku fulin doonin duullimaadyo aan fasax loo haysanin oo ay ku maraan hawada Giriigga.

Waa tallaabadii ugu dambaysay ee uu Aqalka Congress-ka u qaado si uu u xakameeyo in diyaaraddan casriga ah loo gacan galiyo Turkiga oo Mareykanka la ah xulafo ay ku wada jiraan isbahaysiga NATO.

“Ma aqbali karno in Erdogan uu sii wado in isagoo ka faa’iidaysanaya ka mid ahaanshaha NATO uu ka dhuunto cawaaqibka ka dhalanaya ficilladiisa,” ayuu yiri Frank Pallone oo ah xildhibaanka keenay mooshinka.

Sharciga sanadlaha ah ee miisaaniyadda ku baxda waaxda difaaca Mareykanka, oo sanadkan la saadaalinayo inay kor u dhaafto $800 oo bilyan oo doolar, ayaa sidoo kale la hor gayn doonaan Aqalka Sare ee Senate-ka, si uu codka ansixinta ugu qaado.

Xigashada Sawirka, ANADOLU AGENCY

Senator Bob Menendez, oo ah guddoomiyaha Guddiga Xiriirka Arrimaha Dibadda ee Aqalka Sare, ayaa horay u sheegay in uu kasoo horjeedo iibinta diyaaradda uu Turkiga rabo.

Guddigan ayaa si wayn ugu kuur gala ganacsiyada hubka ee uu Mareykanku la sameeyo waddamada caalamka.

Xildhibaanno badan oo ka tirsan Goleyaasha sharci dejinta Mareykanka ayaa xukuumadda Ankara ka carooday kaddib markii ay sanadkii 2019-kii Ruushka kasoo iibsatay Gantaallada Difaaca, taasoo horseedday in Mareykanku uu cunaqabatayn kusoo rogo Turkiga.

Waxaa kale oo Washington ay durbadiiba ka noqotay heshiis ay dowladda Erdogan uga iibin rabtay diyaaradaha dagaalka ee F-35, kuwaasoo Turkiga uu lacagtooda bixiyay.


Like it? Share with your friends!

0

Comments

comments