Dowlada Sweden Oo Balan Qaaday Inay u Hogaansameeyso Heshiiska Ay La Gashay Turkiga.


Spread the love

Ra’iisul wasaaraha Sweden Magdalena Andersson ayaa Axadii wacad ku martay inay u hogaansamayso heshiiskii dhawaan lala galay Turkiga, oo ay ku jiraan balan qaadyadii ku saabsanaa dhiibista argagixisada.

Iyadoo ka hadlaysay xafladda sanadlaha ah ee siyaasadda Almedalen ee Gotland, Andersson waxay sheegtay in aysan la wadaagi karin tafaasiil gaar ah oo ku saabsan heshiiska ay la saxiixdeen Turkiga iyo Finland ka hor shirweynaha NATO ee June 28-30 ee Madrid.

Andersson ayaa sheegay in kuwa aan ku lug lahayn dhaqdhaqaaqyada argagixisanimada aysan u baahneyn inay ka walwalaan. “Muwaadiniinta Iswidishka ah laguma wareejin karo si waafaqsan sharciga dalka iyo kan caalamiga ah, haddii aadan ka qayb qaadan dhaqdhaqaaqyada argagixisada, uma baahnid inaad walwal qabto,” ayay raacisay.

Sweden iyo Finland waxay diideen dhexdhexaadnimada waxayna codsadeen inay ku biiraan NATO bishii May, go’aankaas oo ka dhashay dagaalka Ruushka ee Ukraine. Balse Turkiga oo xubin ka ah isbaheysigan ayaa ka dhawaajiyay diidmo uu ku diidan yahay xubinimada, isagoo ku dhaleeceeyay dalalka inay u dulqaataan oo ay xitaa taageeraan kooxaha argagixisada.

Wax yar ka hor inta uusan furmin shirka, ayaa waxaa heshiiska saxiixay Turkiga, Finland iyo Sweden kadib wadahadal afar geesood ah oo ka dhacay caasimadda Spain.

Heshiiska ayaa u oggolaanaya labada dal ee Waqooyiga Yurub inay xubin ka noqdaan NATO, laakiin waxay ku xirayaan inay qaadaan tillaabooyin walaaca argagixisada ee Turkiga, iyo in laga qaado cunaqabateynta hubka ee saaran Ankara.


Like it? Share with your friends!

0

Comments

comments