Shiinaha Oo Beeniyay Eedeyn Aan Caadi Ahayn Oo Uga Timid Maraykanka


Spread the love

Shiinaha ayaa Isniintii beeniyay eedeyn “mas’uuliyad darro” ay ku tilmaantay oo uga timid madaxa hay’adda saadaasha hawada ee Maraykanka, kaasoo sheegay in xukuumadda Beijing ay qabsan rabo qeyb dayaxa.

Bill Nelson oo ah maamulaha hay’adda NASA ayaa waraysi uu siiyay wargeyska Bild ee ka soo baxa Jarmalka ku sheegay in Shiinaha uu wado qorshe uu mashruuc milateri uga fulinayo guudka dayaxa.

Shiinaha sanadihii la soo dhaafay sare u qaaday hawlgalladiisa ku aaddan dayaxa, waxaana uu dayax-gacmeed aanay cidna saarnayn ku dejiyay dayaxa sanadkii 2013. Beijing ayaa sidoo kale doonaysa in dayax-gacmeed awood badan oo qaadi kara cir-bixiyayaal ay dayaxa u dirto inta aan la gaarin 2030.

“Waa arrin walaaceeda leh in Shiinaha uu gaarayo dayaxa, kadibna oran doono “inaga ayaa leh oo cidna uma soo dhawaan karto,” ayuu Bill Nelson ku sheegay waraysiga.

Waxa uu intaa raaciyay in barnaamijka hawada sare ee Shiinaha uu yahay mid ku salaysan cudud milateri, isla markaana ay xukuumadda Beijing fekrado iyo tiknolaajiyad ku aaddan hawlgalkaas ay ka xaday dalal kale.

“Ma aha markii u horreysay ee madaxa hay’adda NASA uu iska indho-tiray xaqiiqda, isla markaana uu sheegay hadal mas’uuliyad darro ah oo ka dhan ah Shiinaha,” ayuu yiri Zhao Lijian oo u hadlay wasaaradda arrimaha dibedda ee Shiinaha.

Waxa uu intaa raaciyay in Shiinaha aanu aqbali doonin waxa uu ku tilmaamay dacaayadda joogtada ah ee uu Maraykanka ka faafinayo hawlihiisa hawada sare.

“Shiinaha waxaa ka go’an inuu hawada sare ka dhiso mustaqbal ay wadaagaan aadanaha oo dhan, waxaana uu ka soo horjeedaa in tartan hubaysan la geeyo hawada sare,” ayuu sheegay afhayeenkaas u hadlay wasaaradda arrimaha dibedda Shiinaha.

Hay’adda NASA ayaa samaysan barnaamij lagu magacaabo Artemis, kaasoo qorsheynaya in sanadka 2024 uu dayax-gacmeed ay dad saaran yihiin ku wareego dayaxa, iyo in sanadka xiga ay cir-bixiyeenno Maraykan ah ka degaan cirifka koonfureed ee dayaxa.


Like it? Share with your friends!

0

Comments

comments