Wararkii Ugu Dambeeyay Dilal Ka Dhacay Qeybo Kamid Ah Magaalada Muqdisho


Spread the love

November 13, 2022
Share0

Waxaa saacadihii lasoo dhaafay xaafaddo ka tirsan degmooyinka Howlwadaag iyo Kaaraan ee Gobolka Banaadir ka kala dhacay dilal qorsheysan loo geystay darawalo gaadiid xamuul kaxeeyn jiray iyo Nabadoon caan ahaa oo lagu magacaabi jiray Xasan Cali Eybakar.
Rag hubeysan oo watay Bastoolado ayaa isgoyska Baar-ubax ee degmada Howlwadaag ku dilay laba Nin oo lagu kala magacaabi jiray Faarax Jimcaale iyo Cabdi Saytuun, kuwaasi oo la sheegay inay darawalo ka ahaayeen gaadiid nooca xamuulka ee ka shaqeeya Muqdisho illaa Gobolada dhexe.
Dhinaca kale xaafad ka tirsan degmada Kaaraan ayaa waxaa xalay fiidkii lagu dilay Nabaddoon Xasan Cali Eybakar oo kamid ahaa Nabaddoonada caanka ahaa gudaha degmadaas, isagoona u geeriyooday rasaas looga dhuftay qeybaha sare ee jirkiisa.
Ma jiro wax war ah oo illaa iyo hadda kasoo baxay laamaha ammaanka dowladda Federaalka Soomaaliya oo ku aadan dilalkaas ka dhacay magaalada Muqdisho oo ay geysteen rag hubeysan, ammaanka Muqdisho ayaa u muuqda mid faraha kasii baxaya.
Shalay iyo habeen hore ayey aheyd markii degmooyinka Dharkeenley iyo Deyniile ee Gobolkaan Banaadir lagu kala dilay Sarkaal Ciidan iyo Imaamkii masaajidka dabaqeynka ee ku yaalla Dharkeenley, waxaana dilalkaas sheegtay mas’uuliyadooda Al-shabaab.

Share0


Like it? Share with your friends!