Warshadii ugu horreysay ee oxygen-ta dadweynaha oo lagu daah-furay Muqdisho


Spread the love
Khamiis, Maarso, 17, 2022 (HOL) – Wasiirka Caafimaadka Xukuumadda Federaalka Soomaaliya Dr Fowsiya Abiikar Nuur oo ay wehliyaan safiirka Midowga Yurub ee Soomaaliya Tiina Intelmann, ku-xigeenka ergeyga gaar ka ah ee QM u qaabilsan Soomaaliya iyo madaxa Ururka Caafimaadka Adduunka (WHO), ayaa maanta isbitaalka De Martino ee magaalada Muqdishu ku daah-furay warshadii ugu horreysay ee dhalisa oxygen-ta dadweynaha.Warshadda ayaa shaqeyneysay tan iyo bishii Diseember balse maanta ayaa si rasmi ah loo daah-furay, waxaana ay qeyb ka tahay dadaaladda ka jawaabida COVID-19. Safiirka Midowga Yurub ayaa sheegtay in labo warshadood oo kale dhowaan lagu rakibi doonaa magaallooyinka Hargeysa iyo Garoowe.

Wasiirada Caafimaadka ee Xukuumadda Federaalka Soomaaliya Dr Fowsiya Abiikar Nuur, ayaa tiri “Isbitaalkan waa midka keliya ee caasimada ee lagu bilaabay in lagu daaweeyo dadkii uu soo ritay xanuunka COVID-ka, laakiin kaddib waxaa jiray isbitaalo kale oo na kaalmeeyay”.

“Sidaasi daraadeed hal oxygen oo dad gaar ah ay leeyihiin ayaa ka jirtay magaalada Muqdishu, waxaana dhib weyn aheyd in dadka loo helo oxgygen, dhibaatadaasi awgeed Wasaarada Caafimaadka, Midowga Yurub iyo Hay’adda Caafimaadka Adduunka ee WHO ayaa ka shaqeeyay in macaawinadii ugu horreysay la geliyo warshadda maanta la daah-furay”, ayey tiri.

Shalay wasiirada caafimaadka ee dowladda Dr. Fawziya Abikar Nuur oo ay wehelinayaan madax sare oo ka socotay hay’adda IOM ee Soomaaliya, ayaa isbitaalka magaalada Dhuusamareeb ku daah-furay warshadda dhalisa oxygen-ta.

Hassan Istiila, Hiiraan Online
[email protected]


Like it? Share with your friends!

0

Comments

comments